Талдықорғанда аймақты дамыту үшін Huawei АКТ Академиясы ашылды
Huawei Technologies Kazakhstan компаниясы Талдықорған қаласында Ілияс Жансүгіров атындағы Жетісу мемлекеттік университетінде жаңа Huawei АКТ Академиясын ашты.
Ашылу салтанатына ҚР Ғылым және жоғары білім министрлігі Мемлекеттік қызметтерді цифрландыру және автоматтандыру департаменті директорының орынбасары Ұлан Несіпқалиев, Жетісу облысы Білім басқармасының басшысы Марат Сүлейменов, Жетісу университетінің ректоры Ермек Бөрібаев, Huawei Technologies Kazakhstan Бас директорының орынбасары Сю Хай, сондай-ақ өңірдің жетекші университеттері мен колледждерінің өкілдері қатысты.
Huawei АКТ Академиясы – ақпараттық-коммуникациялық технологиялар саласында жоғары білікті мамандарды даярлауға бағытталған жаһандық білім беру бағдарламасы. Академия Huawei компаниясының халықаралық стандарттары мен озық тәжірибелеріне сәйкес әзірленген, АКТ саласының заманауи талаптарына жауап беретін әр алуан курстарды ұсынады.
Бағдарлама аясында студенттер бұлтты есептеу, жасанды интеллект, Заттар интернеті, желілік технологиялар және 5G сияқты бағыттар бойынша білім мен дағдыларды ала алады. Оқу бағдарламасында студенттерге алған білімдерін іс жүзінде қолдануға мүмкіндік беретін практикалық сабақтар, семинарлар мен тренингтер де бар. Оқуды сәтті аяқтап, емтихан тапсырған Академия қатысушыларына әлемдік деңгейде танылған Huawei сертификаттары беріледі.
«Біз Huawei сияқты озық компаниямен ынтымақтастықты жоғары бағалаймыз. Бұл студенттер мен мамандар үшін өз білімдерін тереңдетуге және цифрлық дәуірдің қиындықтарына дайындалуға тамаша мүмкіндік. Академия еңбек нарығында сұранысқа ие АКТ саласындағы жоғары білікті мамандарды даярлау орталығына айналатынына сенімдіміз», – деп атап өтті Жетісу университетінің ректоры Ермек Бөрібаев.
Сапалы оқытуды қамтамасыз ету мақсатында Huawei АКТ Академиясы озық жабдықтармен және инфрақұрылыммен жабдықталады. Академия сонымен қатар студенттерге Huawei компаниясының АКТ саласындағы жаһандық тәжірибесіне негізделген соңғы инновациялар мен технологиялық әзірлемелерге қол жеткізуге мүмкіндік береді, бұл олардың дағдылары мен білімдерін жақсартуға көмектеседі.
«Huawei әрқашан білім мен талантты дамытуға көп көңіл бөлді. Жетісу университетінде Huawei АКТ Академиясының ашылуы – бұл жас мамандар үшін жаңа мүмкіндіктер жасауға және елдің ат саласы үшін жоғары білікті кадрлар даярлауға қосқан үлесіміз. Біз қазақстандық университеттермен ынтымақтастығымыз инновациялық үдерістерді жеделдетуге және цифрлық саланы басқара алатын мамандарды даярлауға көмектесетініне сенімдіміз, – деп бөлісті Huawei Technologies Kazakhstan Бас директорының орынбасары Сю Хай.
Жетісу университетінде АКТ Академиясының ашылуы Huawei-дің қазақстандық жоғары оқу орындарымен көп жылдық ұзақ мерзімді серіктестігінің нәтижесі болып табылады. Бұл бастама кәсіби ресурстарды дамытып қана қоймай, сонымен қатар ел үшін тұрақты цифрлық шешімдерді құра отырып, инновациялық экожүйені қолдайды.